მაკა კოკაია: პროფესია — „ადამიანების გახარება“

დავიბადე და გავიზარდე პედაგოგების დიდ და თბილ ოჯახში, სადაც ადამიანებთან ურთიერთობა და ცოდნის გაზიარება ცხოვრების წესი იყო. მიუხედავად იმისა, რომ პროფესიით თავადაც პედაგოგი ვარ, ჩემი ნამდვილი მოწოდება ხელოვნების იმ ჯადოსნურ სამყაროში ვიპოვე, რომელიც ბავშვობიდან ჩემი ბედნიერების მთავარი წყაროა.
ხელსაქმისადმი სიყვარული ჩემს ოჯახურ მემკვიდრეობას უკავშირდება — ქსოვის ხელოვნება დედამ შეგვაყვარა, რამაც საფუძველი ჩაუყარა ჩემს სურვილს, შემექმნა გამორჩეული და ორიგინალური ნივთები. უკვე 12 წელია ამ სფეროში ვარ, მუდმივად ვვითარდები და ვიზრდები. ჩემთვის ეს საქმიანობა მხოლოდ ხელობა არ არის; როდესაც ჩემი პროფესიის შესახებ მეკითხებიან, ყოველთვის ვპასუხობ: „ჩემი პროფესია ადამიანების გახარებაა“.

უდიდეს ბედნიერებას მანიჭებს იმის განცდა, რომ ჩემს ნამუშევრებს წვლილი შეაქვთ ადამიანების თუნდაც წამიერ სიხარულში. ჩემი მიზანია, უფრო დიდ აუდიტორიას წარვუდგე კიდევ უფრო დახვეწილი და შთამბეჭდავი შემოქმედებით. მე ვაკეთებ იმას, რაც მაბედნიერებს და მჯერა, რომ ეს სიყვარული თითოეულ ნივთში აისახება.